فه‌رهه‌نگی پیاوسالارانه‌ی كۆمه‌ڵگه‌ی مرۆڤایه‌تی به تایبه‌تی له ئێران و كوردستان دا، تا ئه‌م زه‌مه‌نه له مێژوو شایه‌تی زوڵم و زۆری و پێشێل كردنی مافه ره‌واكانی ژنان له كۆمه‌ڵگه بووه، ئه‌مما به تێپه‌ڕبوون وبه‌ره‌وپێش چوونی ره‌وتی پێشكه‌وتنه‌كانی یه‌ك له‌دوای یه‌ك هزرێكی نوێ و ره‌وتێكی جیاواز بۆ به‌ده‌ست هێنانی ئه‌و به‌شه كه مافه پێشێل كراوه‌كانی ژنان، بۆ دروستكردنی هاوسه‌نگێیه‌كی كۆمه‌ڵایه‌تی و به‌رابه‌ری له نێوان ژن و پیاو دا هاته ئاراوه.
بۆیه 8 مارسیش وه‌ك رۆژێكی دیاری كراوی ئه‌م خه‌باتی مرۆڤایه‌تیه و ناوك وترۆپكی گه‌شه‌ی ئه‌م ره‌وته بۆ ژنان و كۆمه‌ڵگه‌ی مرۆڤایه‌تی ناسراوه، وه له راستیدا ئه‌مه مۆركێكه بۆ سه‌ر ته‌وێڵی كۆمه‌ڵگه‌ی پیاوسالار و ئه‌و یاسا و رێسایانه‌ی كه مافه‌كانی ژن زه‌وت ده‌كه‌ن.
ئێمه وه‌ك یه‌كێتی دیموكراتی كوردستان له‌م كاته دا ده‌رفه‌ت به باش ده‌زانین كه سپاس و پێزانینیمان ئاراسته‌ی هه‌موو تێكۆشه‌ران و چالاكڤانانی رێگه‌ی به‌رابه‌ری و یه‌كسانی بكه‌ین.
هه‌روه‌ها پیرۆزباییمان ئاراسته‌ی سه‌رجه‌م تێكۆشه‌رانی ئه‌م ره‌وته له كوردستان ده‌كه‌ین و جارێكی دی پاڵپشتیی و یارمه‌تی خوه‌مان به هه‌موو شێوه‌یه‌ك بۆ خێراتر كردنی ئه‌م ره‌وته و به ده‌ره‌نجام گه‌یشتنی سه‌رجه‌م تێكۆشانه‌كان دووپات ده‌كاته‌وه.
:: به‌رز و پێرۆز بێت رۆژی 8 ی مارس رۆژی ژن و رۆژی به‌رابه‌ری و یه‌كسانی ::
یه‌كێتی دیموكراتی كوردستان
08/03/2010
